Acts 26
1La sou Axulipa muvikala mulai noxou Paulo aloxo 'o, “Laixe lexe nini mene navikalasine.” La Paulo muavuti sou mutovola'i no avolu mo musokou sou muvikala sou mu'oxo latolosou. 2“Tatananu tuala Axulipa. Eni examuli laixe sou atulu no ieni vaimomo 'o sou loxo a'oxonu latolosilo no anu vaivaikala mukalusi ane ta Iutaia mitelonu noxilo. 3Xo nini nelavu laixe no anu 'ili'ilixo mukalusi noxi'a ta Iutaia mo no anu mimii ane telavusou ta'otosou ananexe sou. La sou eni alinga noxine lexe naxolu se'isisi mo nalomu laixe une'e noxilo.4Ta Iutaia mukalusi ne milavusou maulixo mo xoluxoluxo no mine molomoloxo mo milavusilo no mine eni esokou xaixai noxilo no nano no xalee tuala tila noxilo mo ne Ielusalemu kalumo. 5 aAne'i milavusilo maxuveeni mo lexe imasaxa la umomomo sou ia'aloxu lexe eni emulinu vote'i pekia'u noxixe iouvilemo sou talotu noxou Lataua la eni ne exali axo Palisaio vile. 6 bIa loopala noxilo no anu mii ma'ia ane Lataua musakii vaikala sou noxi'a ta xaixasinge, la sou eni a atulu no anu vaivaikala sou vaimomo 'o. 7Vaikala e misakiinu ne ane ta mata noxinge ta Isilaeli mavulovexa mo mulu'e no lia tamei iloloopala sou lexe imaisou uxali manina no mine loxo ane'i ilolotu noxou Lataua no aso mo no 'olovoxo utotomu. Nini tila. Ta Iutaia itulusilo no anu vaivaikala 'o xo eni loopala ane nesi. 8Sou tava'u loxovaa ane ngingi ukalusi ngaxavutala lexe ngingi ngamuxaxu tangengi lexe Lataua umomomo sou utulusi'a ane'i ane misoisoli uasi 'o?
9 cEni kalumo exavutala lexe anu laixe sou eni a'oxonu mii mukalusi se'i e umomomo sou u'oxo masuanu Iesu sie Naseleti ualasou. 10Mo mimii ane nesi eni e'oxonu ne Ielusalemu. No anu xavi noxi'a ta tatilasi'a ta aili'i, la eni emuxaxa'a ta mitema ta piena noxou Lataua, no nano no anu tani sou navunavu, mo no mine ta tilasi'a ive'a isoli, la eni kalumo apala'anixu masaxa noxilo sou lexe ane'i isoli. 11Alaxu piena, la eni alutu alai no anu ta taasou lalotu noxi'a ta Iutaia mukalusi sou elosi'a ialuxu mo etovo eve'a sou lexe ixiu tumali'a mo ivikala masua noxou Iesu. Eni la'iaxoi'a manina la elai kalumo no tuala tatila va'ava'axu sou a'oxo masuane'i. 12Mo no anu muamua'i ane loxo ne vile, la eni elalai ne Temasukasi no anu xavi mo noxi'a ta tatilasi'a ta aili'i, 13Tila noxilo, no anu aso mukulupa, la eni emuamua'i no vote'i, ia emaisou lamana vile molu no opo loxotolo ne kaaxu muaulixu aso ia muiei mune'e mutaasixe noxi'a ta menexilo e temuamua'i ne. 14La nexi mukalusi ne telapalapau telai no lia. Ia, eni elomusou itema vile muvikala mune'e noxilo no anu vaikala Evalaio aloxo 'o, ‘Saulo, Saulo, Loxovaa ane nini na'oxonu masualeli 'o? Anu pekia'u noxine sou nini navalinu tavaineu mii ane anaanaxu.’ 15La sou eni etali'i aloxo 'o, ‘Nini 'ena'ei, nini Tila?’ La Tila mukolileli aloxo 'o, ‘Eni Iesu ane nini na'oxo masumasualeli 'o. 16Ia naavuti natelo mo natulu no tavaine. Eni exali noxine ne sou asosovosine aloxo itema sou xaixai noxilo vitanisi mo aloxo itema sou ua'aloxu mii ma'ia ne nini namaisou noxilo mo mii ma'ia ane eni amaxa'u noxine ili'i. 17Eni a'umeneni noxi'a ta mitema noxine mo noxi'a ane ta Iutaia uasi. Eni apalusine noxi'a ta mitema ane'i ta Iutaia uasi, 18 dsou nakisiinu ie'i mo naxiune'i me 'a no anu isivoxo ine'e no anu lamana. Mo ixexee no anu xavi noxou satani io ine'e noxou Lataua mo sou Lataua ululusou susu noxi'a mo ane'i ino'u saxisaxila'u noxou Lataua loxo ane'i ane mimuxaxu tane'i noxilo mo mixali ta mitema noxou Lataua maninasou.’ 19Aolxo ne la sou tatananu tuala Axulipa, eni alomuxu mii loxo aipiepiena e molu no opo loxotolo. 20Tei ne eni esoko ea'alo noxi'a ane'i ane mixolu ne Temasukasi mo noxi'a ane'i ane mixolu ne Ielusalemu, mo no xalee lia ne Iutaia mukalusi mo noxi'a ta mitema ane'i ane ta Iutaia uasi kalumo. Eni ea'alo lexe laixe sou ane'i ixiu opone'i no anu 'ilixo masumasua io ine'e noxou Lataua, mo 'ilixone'i umaxa'u lexe ane'i mixiu mukalu. 21Tava'u aloxo ne, la sou ta Iutaia mitetelisilo no taasou lalotu tatila noxou Lataua, mo mi'oxe ivelo asoli. 22Ia Lataua musu'ulilelisi mo eni exolu laixe mune'e muxali no voxo ane vaimomo 'o, la sou eni atulu pekia'ilo 'o sou aa'alo lamana ulai noxi'a ta mitema vitavitanisi mo ta mitema ta tatila kalumo. Eni avikala iouvilesisi no anu mii ma'ia ane ta mitema sou palomatana ilo'a Mosesi mivikala lexe uxali uasi. 23 eAne'i mivikala lexe Kalisito ne Anu utavule tu'umaxu e Anu itema sou utulu tei no anu soli, la sou Anu ua'aloxu lamana ulai noxi'a ta mitema noxou la mo ulai noxi'a ta mitema ane'i ane ta Iutaia uasi kalumo.”
24No mine Fesuto mulomusou vaivaikala noxou Paulo ne la sou muavuti la mukaitolonu Paulo la muvikalanu aloxo, “Paulo, nini neno'u lavulavu tatila la sou lavulvau noxine ne a uxovulaulaulixene mukalu.” 25La Paulo muavuti la muvikala aloxo 'o, “Tila Fesuto, eni axovulaulau uasi. Mii ma'ia ane eni alelemolu ne, anu manina mo mulapu. 26Tatananu tuala Axulipa anu muno'u lavulavu no anu mii ane eni umomomo sou avikala papaxe ulai noxou. Eni elavu lexe mii vile no anu mimii ano 'o ne utalume noxou uasi xo mimii ane 'o uxali no mailu'a uasi. 27Tatananu tuala Axulipa, loxovaa nini nemuxaxu taneni no anu vaikala noxi'a ta mitema sou palomatana? Eni elavu lexe nini nemuxaxu taneni.”
28La Axulipa muvikalanu Paulo aloxo 'o, “Nini nexavutala a loxovaa, no anu voxo ataxu se aloxo 'o ne, la nini namomomo sou na'oxoleli axali itema noxou Kalisito?” 29La sou Paulo muavuti mukolinu aloxo 'o, “Voxo ataxu mo voxo veveeni ne anu mivile uasi, xo eni akilaka noxou Latauasi ne ninisisi uasi, ia ane'i ukalusi ane ilolomu noxilo vaimomo 'o ne umomomo sou ixali aloxo eni 'o. Ia eni amasaxa lexe nini nasakii no anu seni uasi loxo eni 'o.” 30Xe tatananu tuala muavuti mutulu, la itema tila sou usaxila'u xalee lia tila ne Iutaia mo Belunike mo ane'i ane ilo'a mixolu ne mitulu kalumo. 31No mine mipaxele sou milalaa, xe mivivikala ngatongato'o la mivikala aloxo 'o “Itema ano 'o u'oxonu mivile masua ane umomomo sou usoli mo uxolu no anu taasou navunavu uasi.” 32La sou Axulipa muvikala mulai noxou Fesuto lexe, “Itema ano 'o ne lexe anu ulinga sou utulu mo uvikala no iou Kaisari uasi, la nini umomomo sou nalulusou ulai.”
Copyright information for
ATA